ថៃ៖ ស្ត្រីជនជាតិថៃបានបើករថយន្តបុកពីក្រោយស្ត្រីជនជាតិខ្មែរម្នាក់បណ្តាលឱ្យរងរបួសធ្ងន់ធ្ងរខណៈកំពុងដើរតាមផ្លូវក្នុងក្រុងបាងកក ម្តុំប្រាទូណាម នារសៀលថ្ងៃទី១៥ ខែវិច្ឆិកា ឆ្នាំ២០២២។

តាមប្រភពពីម្ចាស់គណនីហ្វេសប៊ុកឈ្មោះ Nov Navin ដែលបានផ្សាយផ្ទាល់ (Live) ចេញពីកន្លែងកើតហេតុបានឱ្យដឹងថា នៅមុនពេលគ្រោះថ្នាក់ចរាចរណ៍នេះកើតឡើង ជនរងគ្រោះបានដើរតាមផ្លូវជាមួយប្អូនស្រីបង្កើតម្នាក់ទៀត ប៉ុន្តែស្រាប់តែអ្នកបើកបរជនជាតិថៃបានបើករថយន្តយ៉ាងលឿនសំដៅមកស្រ្តីជនជាតិខ្មែរម្នាក់បណ្តាលឱ្យបាក់ត្រកៀក និងបាក់ជើង ហើយស្ត្រីម្នាក់ទៀតរងរបួសស្រាល។ ភ្លាមៗជនរងគ្រោះត្រូវបានបញ្ជូនទៅកាន់មន្ទីរពេទ្យ។

តាមវីដេអូឡាយ ក្រោយហេតុការណ៍នេះកើតឡើង អ្នកបើកបរជនជាតិថៃនោះមិនបានបើករត់គេចទៅណាឡើយ ដោយជនជាតិថៃបានបញ្ជាក់ថាខ្លួននឹងទទួលខុសត្រូវចំពោះហេតុការណ៍នេះ៕